Home / Breaking News  / కోదండరాం కొలువు కోసమే…కొట్లాట సభ

కోదండరాం కొలువు కోసమే…కొట్లాట సభ

హైదరాబాద్‌: ఉద్యోగాల భర్తీలో ఆలస్యానికి విపక్షాల కేసులే కారణమని,తెలంగాణ ప్రభుత్వంపై టీజేఏసీ చైర్మన్‌ కోదండరాం అసత్య ప్రచారం చేస్తున్నారని టీఆర్‌ఎస్‌ నేతలు బాల్క సుమన్‌, పల్లా రాజేశ్వర్‌ రెడ్డిలు ఆరోపించారు. వారిక్కడ శనివారం మాట్లాడుతూ కోదండరాం కొలువు కోసం కొట్లాట సభ నిర్వహిస్తున్నారని విమర్శించారు. రాష్ట్రంలో లక్షా 12 వేల ఉద్యోగాల భర్తీకి ప్రభుత్వం కట్టుబడి ఉందన్నారు. ఇప్పటికే 27 వేల ఉద్యోగాలు భర్తీ చేశామని.. మరో 63 వేల ఉద్యోగాల భర్తీ ప్రక్రియ కొనసాగుతోందని వెల్లడించారు. ఉద్యోగాల గురించి మట్లాడే అర్హత కాంగ్రెస్‌, బీజేపీలకు లేదని మండిపడ్డారు.

నిరుద్యోగులు కోదండరాం వలలో చిక్కుకుని భవిష్యత్‌ను పాడు చేసుకోవద్దని కోరారు. నిరుద్యోగుల భుజాలపై తుపాకులు పెట్టి రాష్ట్ర ప్రభుత్వాన్ని కాల్చాలని కోదండరాం కుట్ర పన్నారని నిప్పులు చెరిగారు. టీఎస్‌పీఎస్సీ సిలబస్ కమిటీలో కోదండరాంకు చోటు కల్పించిన విషయం మరిచిపోవద్దని సూచించారు. ఉద్యోగాల భర్తీపై డిప్యూటీ సీఎం కడియం శ్రీహరి పదిహేను రోజులకో సారి సమీక్ష చేస్తున్నారని సుమన్ స్పష్టం చేశారు.

ప్రాంగణానికి శ్రీకాంతాచారి పేరు
డిసెంబర్‌ 4వ  తేదీన సరూర్‌ నగర్‌ ఎల్బీనగర్‌ స్టేడియంలో కొలువుల కొట్లాట సభ జరుగనుంది. దీంతో అక్కడ జరుగుతున్న ఏర్పాట్లను కోదండరాం పరిశీలించారు. సభా ప్రాంగణానికి శ్రీకాంతాచారి పేరు పెడుతున్నట్టు ఆయన తెలిపారు. ఖాళీగా ఉన్న ఉద్యోగాలను వెంటనే భర్తీ చేయాలని డిమాండ్‌ చేశారు. ఉద్యోగ నియామకాలపై ప్రభుత్వం మాట తప్పిందని ఆరోపించారు.

Facebooktwittergoogle_plusredditpinterestlinkedinmailby feather
Review overview
NO COMMENTS

Sorry, the comment form is closed at this time.